EHU: Euskal Herrian tinko erroturik munduko plazara jalgi

Mundu mailako izurriteak inoiz bizi izan ez dugun egoera batean utzi gaitu. Herritarrak ezagutza zientifikoari begira jarri gara, zientzialariek ataka latz honetatik aterako gaituztelakoan.

Gure herri zatituan ezagutza zientifikoaren sortzaile nagusi dugu Euskal Herriko Unibertsitatea. Produkzio zientifikoaren zenbakietatik harago, azken hilabeteetan EHUko ikertzaileen ekimenek (berrikuntzak PCR testak egiteko, adibidez) eta agerraldi publikoek hedabide ezberdinetan balio izan dute, instituzio politikoek jarritako oztopoen gainetik, euskal herritarrek unibertsitate publikoarekiko konfiantza areagotzeko. Bistan da XXI. mendeko arrisku berrien aurrean EHUk baduela asko eskaintzeko Euskal Herriko gizarteari.

Ostegun honetan izango dira EHUko Errektore berriak aukeratzeko hauteskundeak. Inkognitaz beteriko testuinguru bati aurre egin beharko dio unibertsitate publikoak datozen urteetan, alegia, oztopo eta muga asko gainditu beharko ditu: finantziazio publiko eskasa, oraindik ere hamarkadaren hasierako neurrietara heltzen ez dena; egungo behin-behinekotasuna gainditzeko enplegu egonkorra eskaintzeko oztopo legal eta ekonomikoak; ikerketa bermatzeko behar beste baliabide ez izatea. Horri gehitu behar zaio Jaurlaritza osatzen duten alderdiek, baita beste eragile pribatu zenbaitek ere, Bilbon zein Gasteizen bultzatutako “unibertsitate” pribatuen ugaritzea, geraraztea ezinezko izango dena lege-esparrua aldatu ezean.

Euskal Herrian tinko errotutako unibertsitate publikoa

Unibertsitatea euskararen lurraldean erroturik nahi dugu, ez soilik EAEra begira dagoena, ezta unean-uneko Gobernuei men egingo diena ere. Bai, aitzitik, bere autonomia defendatuko duena.

Euskal gizarte demokratiko eta aurrerakoiaren beharrak aintzat hartzen dituen unibertsitate publikoa defendatu behar dugu, olatu neoliberal indartsuari aurre egiteko. Eta etxetik bertatik abiatu behar gara: langileen ezegonkortasuna, lan-jardunaren partzialtasuna eta baldintza onartezinak gainditzeko neurriak bultzatuz; gure herriko enpresa txiki-ertain, kooperatiba eta askotariko eragile sozialekiko elkarlana sendotuz; gizarteak eskatzen dituen zerbitzu publikoen inguruko gogoeta eta proposamenak landuz; bakegintza eta elkarbizitza demokratikoa lortzeko bidean, euskal presoak herriratzeko ahaleginetan lagunduz;  Euskal Herrian diren unibertsitate publiko guztien zein herri ikuspegia duten gainontzekoekiko lankidetzaren aldeko hautua eginez, horrek gure herriaren egituratzean lagundu dezakeelakoan.

Gure berezko hizkuntza den euskara irakaskuntza-, ikerkuntza- eta zerbitzu-hizkuntza izan dadin sustapen sendoa egingo duen unibertsitate publikoa nahi dugu, gure egoeratik abiatuta, baina helburu argia izanik: euskara unibertsitate-eremu eta plaza guztietan normaltasunez erabilia izatea.

Euskal gizartearen premiak kontuan hartuko dituen ikerkuntza-lerroak sustatzeko zein nazioarte mailan lehenesten diren ikerketa-ildoak gauzatzeko behar beste giza baliabide zein ekonomiko bermatuko dituen unibertsitatea ezinbestekotzat dugu.

Genero berdintasunean eredugarria izatea, orain arteko egitura ahulak sendotzeko  (Berdintasunerako Zuzendaritza, Berdintasunerako Batzordeak zein Hezkidetza Batzordeak), eta egitura horiek askotariko baliabideekin hornitzeko lan egingo duen unibertsitatea sustatu nahi dugu, egiten den lanari eta egiturei ikusgarritasuna bermatuko diena. Eta helburu horiek erdiesteko unibertsitateko bestelako taldeekin (talde feministak, LGTBIak) elkarlanean aritzea ezinbestekotzat joko duen unibertsitate publikoa nahi dugu.

Langileen lan-baldintza egokiak bere baitan bilduko dituen euskal lan-harremanen marko bat lortze aldera arituko den unibertsitatea behar dugu. Ildo horretan, irakasle, ikerlari eta administrazio eta zerbitzuetako langileen artean dagoen behin-behinekotasun eta partzialtasun tasa handia nabarmen jaistea, langile guztiok soldata duinak izatea eta EHUn dagoen enplegu mailari eustea bultzatuko duen unibertsitate publikoa defendatuko dugu.

Gradu eta graduondoetara ikasleen sarbide unibertsala bermatzeko, tasak, lehen zein bigarren eta ondorengo matrikulak jaitsiko dituen unibertsitate publikoa izan behar da gurea. Bide batez, inork unibertsitatean ikasteko aukerarik gabe gera ez dadin beken politika egokia bultzatuko duena. Eta noski, ikasleak unibertsitateko eragile aktibotzat hartuak izan eta haiekiko behar den begirunez jokatzea sustatuko duena, jokabide autoritario eta errepresiboak albo batera utziko dituena.

Kudeaketa demokratiko eta parte-hartzailea, gardentasuna, eztabaida zabala eta izpiritu kritikoa ipar izango dituen unibertsitatea behar du izan EHUk. Horretarako, komunitatearen gehiengo demokratikoen eta instituzioaren eginkizunak eta beharrak lehenetsiko dituena. Errektorea hautatzeko zein barne-funtzionamendurako araudia egokitzearen eta gaurkotzearen alde arituko dena.

Horrela ulertzen dugu guk bikaintasuneko unibertsitatea. Marraztu dugun unibertsitate-eredua partekatzen duten komunitateko kide euskaltzale eta ezkertiarrak gonbidatzen ditugu datozen urteetan horren alde lan eta borroka egitera. 

Mila Amurrio, Koldo Callado, Oskia Agirre, Ekaitz Zulueta, Estitxu Garai, Gabi Elkoroaristizabal, Gema Lasarte, Joxi Imaz,  Marimar Lledó, Kike Fernández, Lorea Mendiola, Javi Ibarra

2020ko azaroaren 12ko Klaustroan errektoregaiari LABetik sostengatutako galderak eta jasotako erantzunak

Errektore hauteskundeetan ohikoa denez, errektore izateko hautagaiak programa aurkezteko Klaustroa burutu zen azaroaren 12an. Eva Ferreira errektoregaiak  bere programa aurkeztu zuen eta ondoren klaustrokideek aurkezturiko galdereei erantzun zien. Besteren artean, LABetik sostengatutako 19 galderak erantzun zituen.

Hona hemen erantzunak:

Jarraitu 2020ko azaroaren 12ko Klaustroan errektoregaiari LABetik sostengatutako galderak eta jasotako erantzunak irakurtzen

INDARKERIA MATXISTA IDENTIFIKATU, SALATU eta BORROKATU!

Azken datuen arabera, indarkeria matxistak gora egin du hilabete hauetan. Bizi dugun salbuespenezko egoerak argi uzten du jendarte gisa dugun askatasun-murrizketa, non argi eta garbi baiezta baitezakegu emakumeok pandemia honen ondorio zuzenenak pairatuko ditugula eta jasango ditugula. Gure bizitzaren prekarizazioa etengabea da eta egoera honetan intentsitate handiagoz gertatzen da.

Jarraitu INDARKERIA MATXISTA IDENTIFIKATU, SALATU eta BORROKATU! irakurtzen

Osagarriak: iruzur gehiagorik ez! Urtean, dagokion deialdia!

UPV/EHUko ordainsari-osagarri gehigarrien ibilbidea oztopoz beteta egon da ia hasieratik: etenak (2011tik 2014era, lau urtetan zehar ez ziren deituak izan), murrizketak (2015ean ezarri zen ebaluazio protokoloaren formula, lehenengotik aurrera, ebaluazio aldi bakoitzean osagarri bat baino gehiago igotzea galaraziz) eta eragin ekonomikoen atzerapenak (deialdia-ebaluazioa-ordainketa tartea 2 urtera luzatuz B-A osagarrientzat). Orain, ebaluazio protokoloaren inguruan azken urteotan bizi izan dugun auzia aitzaki hartuta beste atzerapen bat gehitu nahi digute, urteko osagarrien deialdia urtebete atzeratuz.

Jarraitu Osagarriak: iruzur gehiagorik ez! Urtean, dagokion deialdia! irakurtzen

EHUko Zuzendaritzak ez du onartu LABek kontziliazioari eta jardunaldiari buruz egindako ekarpenik

Atzo goizean bildu zen AZPko Negoziazio Batzordea UPV/EHUko Administrazioak urriaren 1etik abenduaren 31ra bitartean proposatu dituen “ez-ohiko kontziliazio neurriak” eztabaidatzeko. Zoritxarrez, Administrazioak erakutsi zuen jarrera itxiak horren inguruko akordioa galarazi zuen. Jarrera itxi horren erakusle dira, esaterako, aldaketa formal pare bat baino ez onartzea, edota LABek egindako 22 proposamenetatik batere onartu nahi ez izatea.

LABen ustez unibertsitateko Administrazioak mahai gainean jarritako proposamenak Gerenteari dagozkion eskumenak baino ez ditu biltzen, hots, urtero argitaratzen den lanaldi, lanorduen kontrol, opor eta baimenak zehazten dituen Gerentearen zirkularrean biltzen diren horien egokitzapen bat baino ez izan da aurkeztu dutena (beraz, sindikatuekiko akordiorik behar ez duena) eta, ondorioz, horietatik kanpoko proposamenik ez zegoela negoziagai adierazi dugu.

Aurrekariak

Gogoratuko denez, Covid-19aren pandemian zehar EHUko zuzendaritzak hainbat ebazpen argitaratu ditu langileen ordezkariekin kontsultatu eta, are larriagoa dena, negoziatu gabe. LABek egindako salaketek EHUko Administrazioa langileen ordezkariak informatzera eta beharrezkoak diren gaietan negoziatzera eraman du.

Ekainean izandako lanaldiaren eta kontziliazio neurrien inguruko negoziazioetan, LABek hiru puntu aldarrikatu zituen: Lehenik eta behin, akordioa (2020ko ekainaren 17koa) aldi baterakoa (irailera arte) izatea, eta hurrengo ikasturteari buruzkoa akordio hori sinatutakoan negoziatzen hastea; bigarrenik, telelanean jarduteko eskubidea aitortzea, batez ere kontziliatu beharra zuten eta kalteberak diren langileei; eta hirugarrenik, lanaldiaren adaptazioa edota murrizketak izateko eskubidea aitortzea, azken hauen kasuan soldata-murrizketak laburturiko jardunari proportzionalak ez izatea eskatzen genuelarik.

Akordio hori, LABen aldarrikapen guztiak asetzen ez bazituen ere, zenbait eskubide aitortu zizkien unibertsitateko AZPko langileei (ez guztiei) aldi zehatz batetarako. Gainera, unibertsitateko Zuzendaritzak bere konpromisoa agertu zuen kontziliazioa eta telelana arautzeko negoziazioak irekitzeko AZP eta IRI kolektiboetan. Konpromiso hau, aitzitik, ez du bete Administrazioak, datarik ezta proposamenik ere ez dagoela gai horietaz edota lan osasunekoetaz hitz egiten hasteko.

Administrazioak hartutako konpromisoa betetzeko zai

Oraingoan, berriro ere, Administrazioak negoziatu daitezkeen gaiak mugatu ditu momentuko bere interesen arabera, eta sindikatuok aurkeztutako bestelako gai mamitsu eta orokorragoak baztertu ditu, eztabaidatzeko aukera eman gabe.

Ildo horretan, bai lanaldiaren banaketa bai AZPren osasuna babestea Gerentziaren eskumenak dira, eta, ondorioz, Errektoretza Taldearen aukera ezin hobea da komunikabideetan adierazten duena benetako konpromisoa dela erakusteko eta pandemian zehar gure osasuna bermatzeko neurriei lehentasuna emateko.

LABek langile guztien eskubideak defendatzen jarraituko du, eta negoziatzeko eta adosteko prest dago. Aurkeztu ditugun proposamenak oinarri izan daitezke AZPren eskubideak bateratzea ahalbidetuko duen akordio baterako, besteak beste, osasuna babestea eta UPV/EHUk eskaintzen duen zerbitzu publikoa.