Badirudi momentu erabakigarri batean aurki gaitezkeela. Izan ere, ematen du LABetik hainbeste denboran borrokatutako seiurtekoak eskatu eta lortutakoak kobratu ahal izateko aukera ireki daitekeela. ANECAk eskubide hau onartu du eta orain unibertsitate bakoitzaren esku dago bide hau zabaltzea edo ukatzea. Gure kasuan, UPV/EHU eta UNIBASQen esku dago aukera hau zabaltzea, Estatuko beste unibertsitate batzuk jadanik egin duten moduan.

UPV/EHUko ordainsari-osagarri gehigarrien ibilbidea oztopoz beteta egon da ia hasieratik: etenak (2011tik 2014era, lau urtetan zehar ez ziren deituak izan), murrizketak (2015ean ezarri zen ebaluazio protokoloaren formula, lehenengotik aurrera, ebaluazio aldi bakoitzean osagarri bat baino gehiago igotzea galaraziz) eta eragin ekonomikoen atzerapenak (deialdia-ebaluazioa-ordainketa tartea 2 urtera luzatuz B-A osagarrientzat). Orain, ebaluazio protokoloaren inguruan azken urteotan bizi izan dugun auzia aitzaki hartuta beste atzerapen bat gehitu nahi digute, urteko osagarrien deialdia urtebete atzeratuz.

Badirudi osagarrien iazko deialdiaren ebazpenaren gainean berriak daudela. Hala ere, deialdi horretara aurkeztutako irakasle-ikertzaileek ez dute inongo informazio ofizialik jaso eta ez dakite ea jarraitu behar duten beren eskaera berriarekin edo ez.

LAB eta Steilas sindikatuok behar-beharrezkoa jotzen dugu egoera behingoz argitzea eta eskatzen diogu Unibasqi lehenbailehen esan dezala ea 2017ko deialdiaren ebazpenak emango diren eta noiz helaraziko zaizkien irakasle-ikertzaileei.

Martxan da azkenean 2018ko deialdia. Ez da albiste txarra, dudarik gabe, azken hilabeteotan bizi izan ditugun gora beheren ostean. Honek ahalbidetzen du aurten C osagarrien esleipena. Baina gehigarrizko osagarrien korapiloa behar bezala askatzeko eta prozedura normaltze bidean jartzeko bi auzi nagusi geratzen dira oraindik konpontzeko: 2017ko deialdia ondo ixtea eta bidean galdu dugun urtea berreskuratzea.

Atzo, irailak 28, EHUren Gobernu Kontseiluak irakasle eta ikertzaileentzako osagarri gehigarrien deialdi berria onartu zuen, hain zuzen ere, 2018 urtera bitarteko merituak ebaluatu eta esleituko dituena. Jaurlaritzak eta UPV/EHUko gobernu taldeak ez dute aintzat hartu LAB eta STEILAS sindikatuen proposamena, aurten deialdi metatu bat egite aldera, 2018 eta 2019ko deialdiak batu eta hemendik aurrera deialdien zikloa normalizatzea ahalbidetuko lukeena. Beste behin ere langileon eskubideak kolokan geratu dira Administrazioaren nagusikeria medio. Eta deialdi hau onartuta ere, oraindik ez dakigu zer gertatuko den 2017ko A eta B motako osagarriekin, ezta nola eragingo dion horrek 2018ko deialdi berrikoaren gauzatzeari ere, 2017 eskaria egin zutenen kasuan, behintzat. Gauzak gaur egun dauden moduan beste urtebete galtzeko arrisku larrian gaude CCOO.- en eta Unibasq-en arteko liskarraren ondorioz.